మీ మంచితనాన్ని వాడుకుంటున్నారా? ఈ 3 అలవాట్లు ఉంటే జాగ్రత్త!

ఎవరైనా అడిగితే వెంటనే సహాయం చేస్తున్నారా? మీ అవసరాల కంటే ఇతరుల అవసరాలకే ఎక్కువ ప్రాధాన్యం ఇస్తున్నారా? ఎదుటివారు హద్దులు దాటినా మౌనంగా భరిస్తున్నారా? అయితే కొన్నిసార్లు మీ మంచితనాన్నే ఇతరులు ఆసరాగా తీసుకునే ప్రమాదం ఉందని మానసిక నిపుణులు చెబుతున్నారు. గౌరవం, విలువ అనేవి మన మంచితనంపైనే కాకుండా మన సమయం, శక్తి, హద్దులను ఎంతవరకు కాపాడుకుంటామనే విషయంపైనా ఆధారపడి ఉంటాయని సూచిస్తున్నారు.

ఎప్పుడూ అందుబాటులో ఉండటం
చాలామంది ‘నో’ అని చెప్పడానికి ఇష్టపడరు. ఎవరు పిలిచినా వెళ్లడం, తమ పనులు పక్కన పెట్టి ఇతరుల కోసం సమయం కేటాయించడం అలవాటుగా మారుతుంది. మొదట్లో ఇది మంచితనంగా కనిపించినా, క్రమంగా అది మీ బాధ్యతగానే భావించే పరిస్థితి వస్తుంది.

ఎప్పుడూ అందుబాటులో ఉంటే మీ సమయానికి విలువ లేదనే భావన ఎదుటివారిలో ఏర్పడే అవకాశం ఉంది. మీరు సాయం చేయడం ఒక ప్రత్యేకత కాకుండా సాధారణ విషయంగా మారిపోతుంది. అందుకే అవసరమైనప్పుడు ‘లేదు’ (నో) అని చెప్పడం కూడా ఆరోగ్యకరమైన సంబంధాల్లో భాగమేనని నిపుణులు చెబుతున్నారు.

అవసరాలను మరిచి ఇస్తూనే ఉండటం
కొంతమంది తమ శక్తికి మించి ఇతరుల కోసం కష్టపడుతుంటారు. కానీ అదే సమయంలో వారి అవసరాలు, భావాలను ఎవరూ పట్టించుకోకపోయినా అలాగే కొనసాగుతుంటారు. ఇది ఓ దశ తర్వాత ఇబ్బందికరంగా మారే ప్రమాదం ఉంది.

మీ త్యాగాలు రోజువారీ వ్యవహారంగా మారినప్పుడు వాటి విలువ తగ్గిపోతుంది. మీరు చేస్తున్న సాయాన్ని ఇతరులు సహజంగా తీసుకోవడం మొదలుపెడతారు. ఆరోగ్యకరమైన సంబంధం అంటే ఇద్దరూ ఒకరికొకరు అండగా నిలవడం. ఒకవైపు మాత్రమే ఇవ్వడం కొనసాగితే నిరాశ, అలసట పెరిగే అవకాశం ఉందని మానసిక నిపుణులు హెచ్చరిస్తున్నారు.

హద్దులు దాటినా ఊరుకోవడం
వ్యక్తిగత హద్దులు ప్రతి సంబంధంలో అవసరం. కానీ కొంతమంది ఎదుటివారు తమ హద్దులు దాటినా ఎలాంటి అభ్యంతరం చెప్పరు. ఇది క్రమంగా ఆ ప్రవర్తనను ప్రోత్సహించే ప్రమాదం ఉంది.

ఒకసారి, రెండుసార్లు మౌనం పాటిస్తే అదే కొనసాగుతుందని ఇతరులు భావించవచ్చు. మీకు ఏది ఆమోదయోగ్యం, ఏది కాదో స్పష్టంగా చెప్పకపోతే గౌరవం తగ్గే అవకాశం ఉంటుంది. హద్దులు పెట్టుకోవడం స్వార్థం కాదు. అది ఆత్మగౌరవాన్ని కాపాడుకునే మార్గమని నిపుణులు చెబుతున్నారు.

బ్యాలెన్స్‌ కీలకం
ఇతరులకు సాయం చేయడం, ప్రేమ చూపించడం, అందుబాటులో ఉండడం మంచి లక్షణాలే. అయితే వాటికి హద్దులు ఉండాలి. మన సమయం, శక్తి, భావోద్వేగాలకు విలువ ఇవ్వడం కూడా అంతే ముఖ్యం.

మానసిక నిపుణుల అభిప్రాయం ప్రకారం ఆరోగ్యకరమైన సంబంధాలు పరస్పర గౌరవం, పరిమితులు, బ్యాలెన్స్‌ మీద నిలబడతాయి. మన విలువను మనమే గుర్తించినప్పుడు ఇతరులు కూడా అదే విధంగా గౌరవించే అవకాశం ఎక్కువగా ఉంటుంది.